(ولگˇ گب) جه او زماتی کی سینا مدبّرنیا خانواده، ایتأ جشنواره پیشنهادأ أمه‌رأ بدأیید، تا هسأ، پور زمات بئه. أ زماتˇ دورون، أمن پور کسانˇ أمرأ بینیشتیم و گب بزئیم تا ایتأ تازه طرحأ فأرسئه‌ییم کی اونی نام، بوبؤسته «ولگ» -گیلکی ادبیاتˇ جایزه (یا اوتؤ کی تا هسأ نأشتیم تا بیگیم؛ گیلکی ادبیاتˇ برم). تا هسأ کی فأرسئیم أ برمˇ أوّلی دوره اختتامیه‌یه. أ زماتˇ دورون، «ولگ»ˇ داورانأ، گیلکی ادبیاتˇ پیله کسانˇ جأ دؤجین بوکودیم. داوری دابˇ رئه صؤبت بوکودیم و کارانˇ رئه زمانبندی بوکودیم و پور دئه کاران کی ایتأ ادبی برمˇ برگوزار کودنˇ رئه وأ کودن. خیلی کسانˇ تجربه'نˇ جأ استفاده بوکودیم و فأرسئه‌ییم تا أیه. أنˇ پسیأم خأییم باز، کسانˇ تجربه'نه جمأگیریم تا أ ایتأ کار کی تأنه گیلکی ادبیاتˇ دارˇ رئه، ایته قورصˇ خال ببه. «ولگ» اوخانأ (فراخوان)، مرداد ماه آخری روزانˇ دورون بدأییم و نیویشتنˇ کسانˇ بینیویشته'نه رافا بئسأییم. أ دوره برمˇ مسابقه داوری بنه(پایه)یه نیویشتن-کسانˇ تک اثر قرار بدأییم. امید دأریم، ولگˇ مأنستن کردˇکاران همه تا جیگا بیشترأبه تا أمن بتأنیم أنˇ پسی سالانˇ رئه، گیلکی ادبیاتˇ کتابانˇ رو، مسابقه بنیم و داوران، تترج کتابانˇ رو کی ایته سالˇ دورون منتشرأبید، نظر بدید. اوخان(فراخوان)ˇ پسی، تا آثارˇ اوسئه کودنˇ مهلتˇ آخری روز، شعرˇ جرگه دورون، 38 نفر، داستانˇ جرگه دورونم 11 نفر خوشانˇ بینویشته'نه أمه‌رئه اوسئه بوکودید و سرجمع، شعر‌ˇ جرگه دورون، 93 تا بینویشته و داستانˇ جرگه دورون، 22 تا بینویشته، داوری رئه آماده' بؤست. اوسئه کودنˇ مهلت تومانأبؤسته پسی، آثارأ هرتأ جرگه داورانأ فأرسانئه‌ییم. داوران، خوشانˇ نظراتا بینیویشتید و أمه‌رأ فأدأیید. هرتا جرگه دورون چن‌تا بینویشته کی داورانˇ نظران‌ˇ میان، بیشترین امتیازأ دأشتید کی هأیه بیشتأوستید. أ میان، شعرˇ جرگه دورون، سه تا بینویشته کی بیشترین امتیازأ دأشتید، به عنوانˇ امسالˇ برمˇ برنده'ن اعلام بید و جایزه و لوح تقدیر اوشانˇ نیویشتن-کسانأ تقدیم کونیم. داستانˇ جرگه دورونم، ایتأ بینویشته کی بیشترین امتیازأ بأورده، به عنوانˇ امسالˇ برمˇ برنده، جایزه و لوح تقدیر فأگیره و دوّمی و سوّمی بینویشته'نˇ نیویشتن کسانم ایته لوح تقدیر تقدیم کونیم. همه تأ کسانˇ جأ کی أ برم( جایزه) رئه اثر اوسئه بوکودید و أتؤ، أمه‌رأ کمک بوکودید ممنونیم و چوم-رافایی دأریم کی باز اوشانˇ آثارأ بعدی دؤره'نˇ دورون بیدینیم. أمی داورانم گیلکی ادبیات‌ پیله کسانˇ جأ دؤجین بوکودیم و اوشانˇ جأ تشکر کونیم کی أ کارˇ دورون أمی أمرأ ایلجار دأشتید. ولگˇ شعرˇ جرگه داوران، آقایان محمد فارسی، محسن آریاپاد، مسعود پورهادی، و رحیم چراغی بید. ولگˇ داستانˇ جرگه داورانم، آقایان هادی غلام‌دوست، مسعود پورهادی و علی قانع بید. کی هرتا جه اشانˇ سابقه و کردˇکار أمی ادبیاتˇ میان خؤره مشخّص و روشنه. سرآخر، چن نفرˇ جا تشکّر کونیم کی دأنیم أگه أمی أمرأ نئسابید و أمی بالأ نیگیفته بید، هسأ تا أیه فأنرسئه ییم. سینا مدبّرنیا خانوده جأ ممنونیم کی همه جوره، أمی‌ رئه حامی بید. آقای محمّدتقی پوراحمد جکتاجی جأ تشکّر کونیم کی همیشک أ کارانˇ دورون أمی راهنما و حامی بو و ایسه. آقای هادی میرزانژاد، هم أنˇ وأستی کی أمی دؤجین بوبؤ آثارˇ بینویشته کسانˇ رئه، کتاب هدیه فأدأ، هم أمی کارˇ أوّلی روزانˇ وأستی، کی أ کارأ تا جایی کی تأنستی دونباله بیگیفت. آقای مسعود نجفی جأ ممنونیم کی تمامˇ أمی آرم و پوستر و دعوتنامه و هرچی گرافیکی کار کی خؤب طرّاحی بوبؤسته، أ آقا کاره. آقای رضا بی‌نظیر، سینا مدبّرنیا رفئق و أمی تازه رفئق کی أ آخری روزان، أ کارˇ پیش شؤنˇ رئه، همه جوره سأی بوکود. سرآخرم آقای سروش علیزاده، أمی رفئق کی جه أوّلی روز تا هأ امروز، هر سؤالی کی جایزه ادبی برگزار کودنˇ هأنشر دأشتیم، اونˇ جأ وأپرسئه‌ییم و اونم همه جوره أمه رأ راهنمایی بوکود و خو تجربه'نه أمی أمرأ در میان بنأ. چوم-رافایی دأریم کی باز شمه‌ همه تایه بیدینیم و «ولگ»، خالی ایتأ ولگ ببه، گیلکی ادبیاتˇ جنگلˇ دورون. ولگˇ برمˇ اجرایی جرگه @valggla